ԱՆՀՆԱՐԻՆԸ ՀՆԱՐԱՎՈՐ Է
#Գրադարանըներառականությանհարթակ
Վայոց ձորի մարզային գրադարանը իր սերն ու ակնածանքն է ուղղում հայ կնոջը` խոնարհության, խոհեմության, համբերատարության, հոգատարության, սիրո և ընտանիքին անմնացորդ նվիրվածության համար և արժևորում է հայ կնոջ բացառիկ դերը ազգապահպանության գործում:
Վայոց ձորի մարզային գրադարանը և «Դու մենակ չես» կանանց աջակցման հասարակական կազմակերպությունը համատեղ կազմակերպել էին գրական-երաժշտական ցերեկույթ՝ «Անհնարինը հնարավոր է» խորագրով՝ նվիրված արցախցի կանանց:
Ողջույնի խոսքով հանդես եկավ գրադարանի տնօրեն՝ Արփինե Ավագյանը, կարևորելով կանանց դերը և ևս մեկ անգամ հիշեցնելով, որ հայ կինը հայ ընտանիքի տան հիմքն է, սյունն է, և պատահական չէ, որ այդ տաճարի վրա կառուցվում է հայկականությունը և հայ լինելու կարևորագույն հենքը:
Ցուցադրվեց թեմատիկ տեսանյութ՝ պատրաստված գրադարանի կողմից:
Սպասարկման բաժնի գրադարանավարները ներկայացրեցին հայ կնոջ կերպարը, որը դարերի ընթացքում կատարելագործվել ու ամրապնդվել է՝ իր հիմքում ունենալով մշակութային մեծ ժառանգություն:
Պարային գեղեցիկ կատարումով ելույթ ունեցան Եղեգնաձորում գործող Margaryan DanceStudio «Մարգարյան դանս ստուդիո» պարային դպրոցի սաները, որը ղեկավարում են Արցախից ամուսիններ՝ Վահե Մարգարյանը և Անգելինա Այվազյանը:
Գրադարանի լավագույն բարեկամ Արմինե Ավդալյանը իր երաժշտական հիանալի կատարումներով գեղեցկացրեց միջոցառումը:
«Ղարաբաղի նախշուն բաջի» պարային հրաշալի կատարումով հանդես եկան դպրոցականներ Մարիամն ու Մարին:
«Դու մենակ չես» կանանց աջակցման հասարակական կազմակերպության աշխատակիցները ներկայացրին այն կանանց պատմությունները, ովքեր հաղթահարելով բոլոր փորձություններն ու դժվարությունները շարունակում են ապրել և արարել:
«Դու մենակ չես» կանանց աջակցման հասարակական կազմակերպության տնօրեն Նաիրա Հարությունյանը ամփոփեց միջոցառումը՝ կարևորելով նման միջոցառումների դերը կազմակերպության շահառու կանանց համար:
