ՀԱՆԴԻՊՈՒՄ ՊԱՏՄԱԿԱՆ ԳԻՏՈՒԹՅՈՒՆՆԵՐԻ ԴՈԿՏՈՐ-ՊՐՈՖԵՍՈՐ ԿԱՐԵՆ ՄԱԹԵՎՈՍՅԱՆԻ ՀԵՏ
Վայոց ձորի մարզային գրադարանը հյուրընկալել էր պատմական գիտությունների դոկտոր — պրոֆեսոր Կարեն Մաթևոսյանին, ով հանրությանն է ներկայացնում իր նոր աշխատությունը՝ «Գլաձորի համալսարանի պատմությունից» գիրքը, որը մեծ նվեր է մշակութային ժառանգությամբ հարուստ Վայոց ձորի համար։
Գիրքը ոչ միայն պատմագիտական աշխատություն է, այլ հոգևոր վերապրում, կոչ է՝ վերադառնալ ակունքներին, արժևորել անցյալը և նախնիների թողած հոգևոր մեծ ժառանգությունը։
Կարեն Մաթևոսյանը այս աշխատության մեջ անդրադարձել է Գլաձորի համալսարանի պատմագիտական այն հարցերին, որոնք նախկինում բավականաչափ ուսումնասիրված չեն եղել։
Այս աշխատությունը վավերագրական նյութերի, ձեռագրերի, գիտական վերլուծությունների համադրմամբ ներկայացնում է մեզ 13-14-րդ դարերի Գլաձորի համալսարանը՝ ոչ միայն որպես կրթական հաստատություն, այլև որպես ազգային դիմագրավման, հոգևոր անկախության և մշակութային ինքնության ամրոց։
Գրադարանի տնօրեն Ա. Ավագյանը ներկայացրեց Կարեն Մաթևոսյանին և նրա բազմավաստակ ավանդը հայագիտության բնագավառում։
Միջոցառմանը ներկա էին ՀՀ ԿԳՄՍ նախարարության Մշակութային ժառանգության վարչության Մշակութային ժառանգության պահպանության և զարգացման բաժնի գլխավոր մասնագետ Վարդուշ Մովսիսյանը, մարզային և համայնքային իշխանության պաշտոնյաներ, պատմաբաններ, հուշարձանագետներ, թանգարանային ոլորտի մասնագետներ, գրողներ, ուսուցիչներ և այլք, ովքեր շատ տպավորված էին հանդիպումից։
Միջոցառումն իրենց երաժշտական կատարումներով գեղեցկացրին Եղեգնաձորի երաժշտական դպրոցի սաները։
#Գլաձորիհամալսարանիպատմությունից
