ՀԵՔԻԱԹՆ Է ԿԱՆՉՈՒՄ
Վայոց ձորի մարզային գրադարանում տեղի ունեցավ մանկագիր, հրապարակախոս Սաղաթել Հարությունյանի ծննդյան 105-ամյակին նվիրված միջոցառում, որը հագեցած էր գրական շնչով, ջերմությամբ և հիշողության լուսավոր թրթիռներով։ Նրա ստեղծագործական աշխարհը, որ միշտ հագեցած է եղել բարությամբ 
, խոհունությամբ ու մանկան անմեղ աչքերով տեսած իրականությամբ, ևս մեկ անգամ կենդանացավ ներկաների սրտերում՝ դառնալով ոգեշնչման ու գեղեցիկ զգացումների աղբյուր։
Այդ գրական տրամադրության շարունակությամբ կազմակերպվեց «Լինում են նաև բարի կախարդներ» թեմայով հեքիաթի ժամ, որտեղ հեքիաթն իր կախարդական ուժով միավորեց բոլորին։ Հեքիաթասաց մորաքույրը՝ իր մեղմ ձայնով ու ջերմ ներկայությամբ, և «Տխուր քամին»՝ իր խորհրդավոր կերպարով, կարողացան վերականգնել անտառի մարած գույները ու վերադարձնել նրա երբեմնի ուրախությունը։ Նրանց պատմությունը ոչ միայն հեքիաթ էր, այլ նաև հիշեցում՝ որ բարությունն ու հավատը միշտ կարող են հաղթահարել ամեն տեսակ մռայլություն։
Միջոցառման մասնակիցները ևս դարձան այդ հրաշքի մի մասը․ իրենց ստեղծագործ մտքով ու սիրով նրանք նոր շունչ ու գույն հաղորդեցին թղթե պատկերներին՝ վերածելով դրանք կենդանի ու ժպտացող կերպարների։ Յուրաքանչյուր գունազարդված մանրուք կարծես պատմում էր մի փոքրիկ պատմություն՝ լի հույսով, երազանքով, ժպիտով։
Այս օրը դարձավ ոչ միայն հիշողության և հեքիաթի տոն, այլև ապացույց, որ գրականությունը և երևակայությունը կարող են միավորել սրտերը, լուսավորել հոգիները ու աշխարհին նվիրել ավելի շատ գույն և բարություն։
