ՏԱՐԵՑՆԵՐԻ ՄԻՋԱԶԳԱՅԻՆ ՕՐ

Տարեցների միջազգային օրը՝ Վայոց ձորի մարզային գրադարանում:

Հոկտեմբերի 1-ին ՀՀ ԿԳՄՍ նախարարության «Վայոց ձորի մարզային գրադարան» ՊՈԱԿ-ում նշվեց Տարեցների միջազգային օրը՝ ջերմ, հոգատար և բարեկամական մթնոլորտում։

Միջոցառումը սկսվեց Տեր Ներսես քահանայի օրհնությամբ, ով իր բարեմաղթանքով օրհնեց ներկաներին և օրվա գեղեցիկ հանդիպումը՝ կարևորելով տարեցների նկատմամբ սերն ու հարգանքը, հոգատարությունն ու ուշադրությունը։

Միջոցառումը կազմակերպվել էր «Առաքելություն Հայաստան» բարեգործական հասարակական կազմակերպության Վայոց ձորի մասնաճյուղի նախաձեռնությամբ՝ համակարգող Աննա Սարգսյանի մասնակցությամբ։

Օրվա խորհուրդը ևս մեկ անգամ հիշեցրեց, որ մարդու կյանքի յուրաքանչյուր տարին իր արժեքն ունի, իսկ ապրած կյանքը՝ իր պատմությունը, փորձն ու իմաստությունը։

Տարեցների կյանքի ճանապարհը մեր հասարակության համար ոչ միայն անցյալի հիշողություն է, այլև մարդկային արժեքների, տոկունության և իմաստության կենդանի ժառանգություն։

Գրադարանը, լինելով տարբեր սերունդներին միավորող միջավայր, այս օրը ևս մեկ անգամ դարձավ հանդիպման, շփման, հիշողությունների ու ջերմ խոսքերի հարթակ։

Առանձնահատուկ անդրադարձ եղավ նաև գրադարանում իրականացվող «Ընտանեկան գրադարանավար» ծրագրին, որի շնորհիվ տարեց և տեղաշարժման խնդիր ունեցող ընթերցողներին գրքերը հասանելի են դառնում հենց իրենց տներում։

Միջոցառումը համեմվեց գեղեցիկ գրական-երաժշտական ծրագրով։ Իրենց արվեստով ներկայացան Եղեգնաձորի «Մաեստրո» ստուդիայի սաները՝ գեղարվեստական ղեկավար Արման Վարդանյանի գլխավորությամբ։

Շնորհակալություն ենք հայտնում «Առաքելություն Հայաստան» բարեգործական ՀԿ-ի Վայոց ձորի մասնաճյուղին, Աննա Սարգսյանին, Տեր Ներսես քահանային, «Մաեստրո» ստուդիայի սաներին և բոլոր նրանց, ովքեր իրենց ներկայությամբ ու մասնակցությամբ գեղեցկացրին այս օրը։

Սիրելի՛ ավագ սերնդի ներկայացուցիչներ, շնորհավորում ենք ձեզ Տարեցների միջազգային օրվա առթիվ։

Թող ձեր տարիները լինեն խաղաղ, արժանապատիվ ու լուսավոր, իսկ ձեր փորձն ու իմաստությունը շարունակեն փոխանցվել սերունդներին։

Յուրաքանչյուր արժանապատիվ կյանք մի պատմություն է, յուրաքանչյուր տարի՝ արժեք, իսկ սերն ու հոգատարությունը տարիք չեն ճանաչում։

#ՏարեցներիՄիջազգայինՕր#ՎայոցՁորիՄարզայինԳրադարան#ԱռաքելությունՀայաստան#ԸնտանեկանԳրադարանավար